வரலாற்றுச் சிறப்புமிக்க துர்மா நகரில் நடைபெற்ற சவுதி ஸ்தாபன தினக் கொண்டாட்டங்களில் சவூதி அரேபியாவுக்கான இலங்கை தூதுவர் அமீர் அஜ்வாட் பங்கேற்பு

சவுதி அரேபியாவுக்கான இலங்கைத் தூதுவர் அமீர் அஜ்வாட், ரியாத்தின் வரலாற்றுச் சிறப்புமிக்க துர்மா (Durma) நகரில் 2026 பிப்ரவரி 22 அன்று நடைபெற்ற சவுதி ஸ்தாபன தினக் கொண்டாட்டங்களில் (Saudi Founding Day) கௌரவ விருந்தினராகப் பங்கேற்றார்.

இமாம் முஹம்மது பின் சவுத் என்பவரால் 1727 ஆம் ஆண்டு திரியாவில் (Diriyah) முதலாவது சவுதி அரசு நிறுவப்பட்டதைக் குறிக்கும் வகையில் இந்த நினைவு நிகழ்வு அமைந்தது. துர்மா நகராட்சி ஆளுநர் மற்றும் மேயர் ஆகியோரின் அனுசரணையில் நடைபெற்ற இந்நிகழ்வில், உள்ளூர் சமூகத் தலைவர்கள் மற்றும் மூத்த குடிமக்கள் கலந்துகொண்டனர். சவுதி அரேபியாவின் வளமான கலாச்சார பாரம்பரியத்தை விளக்கும் பாரம்பரிய கைவினைப்பொருட்கள், விளையாட்டுகள் மற்றும் பிரத்யேக சவுதி உணவு வகைகள் ஆகியவை இந்நிகழ்வில் காட்சிப்படுத்தப்பட்டன.

சவுதி அரேபியாவின் விருந்தோம்பல், பெருந்தன்மை மற்றும் சமூக ஒற்றுமை போன்ற ஆழமான பாரம்பரியங்களைப் பிரதிபலிக்கும் வகையில், துர்மா நகராட்சியானது ‘துர்மா தேசிய மேம்பாட்டு சங்கத்துடன்’ இணைந்து பழைய திராவில் (Old Dirah) உள்ள பாரம்பரிய சதுக்கத்தில் சமூக இப்தார் நிகழ்வொன்றையும் ஏற்பாடு செய்திருந்தது.

மேலும், தூதுவர் அமீர் அஜ்வாட்டிற்காகப் பாரம்பரிய நகரத்தைச் சுற்றிப் பார்க்கும் சிறப்பு வழிகாட்டல் சுற்றுப்பயணமும் (Guided tour) ஏற்பாடு செய்யப்பட்டிருந்தது.

ஆண்டுதோறும் பிப்ரவரி 22 ஆம் தேதி அனுசரிக்கப்படும் சவுதி ஸ்தாபன தினமானது, அரேபிய தீபகற்பத்தின் ஆட்சி, ஒற்றுமை மற்றும் ஸ்திரத்தன்மை ஆகியவற்றின் ஆழமான வேர்களைப் பிரதிபலிப்பதுடன், சவுதி அரேபியாவின் வளமான பாரம்பரியம், பழக்கவழக்கங்கள் மற்றும் கலாச்சார மரபுகளைக் கொண்டாடும் ஒரு முக்கிய தினமாகவும் அமைந்துள்ளது.

– இலங்கைத் தூதரகம், ரியாத் (23 பெப்ரவரி 2026)