சவுதி அரேபியாவிற்கான இலங்கைத் தூதுவர் மற்றும் வளைகுடா சுகாதார பேரவைக்கு இடையில் ஆக்கபூர்வமான சந்திப்பு

சவுதி அரேபியாவிற்கான இலங்கைத் தூதுவர் அமீர் அஜ்வத், வளைகுடா சுகாதார பேரவையின் (Gulf Health Council – GHC) பொது மேலாளர் சுலைமான் சலே அல்-தாகீல் மற்றும் சிரேஷ்ட அதிகாரிகளை கடந்த 2026.02.23 அன்று ரியாத்தில் உள்ள அதன் தலைமையகத்தில் சந்தித்துப் பேச்சுவார்த்தை நடத்தினார்.

இந்தச் சந்திப்பின் முக்கிய அம்சங்கள் வருமாறு:

மெனிங்கோகோகல் (Meningococcal) தடுப்பூசி தொடர்பான தற்காலிக விலக்கு

வளைகுடா நாடுகளுக்கு (GCC) பணி நிமித்தம் செல்லும் இலங்கையர்களுக்கு அண்மையில் கட்டாயமாக்கப்பட்ட ‘மெனிங்கோகோகல்’ தடுப்பூசி தேவையை பூர்த்தி செய்வதில் உள்ள சிரமங்கள் குறித்து தூதுவர் இங்கு விளக்கினார். குறிப்பாக, இலங்கையில் தற்போது நிலவும் இத்தடுப்பூசி தட்டுப்பாட்டைக் கருத்திற்கொண்டு, இதற்காக ஒரு கால அவகாசத்தை வழங்குமாறு அவர் கோரிக்கை விடுத்தார்.

தூதுவரின் வேண்டுகோளை ஏற்றுக்கொண்ட வளைகுடா சுகாதார பேரவை அதிகாரிகள், இலங்கையில் போதிய தடுப்பூசி கையிருப்பு கிடைக்கும் வரை, இந்தத் தடுப்பூசி கட்டாயத் தேவையிலிருந்து தற்காலிக விலக்கு அளிக்க உடனடி நடவடிக்கை எடுத்தனர். இந்த முடிவின் மூலம் வெளிநாட்டு வேலைவாய்ப்புக்காக வளைகுடா நாடுகளுக்குச் செல்லவிருக்கும் பெருமளவிலான இலங்கையர்களின் பயணத் தடங்கல்கள் நீக்கப்பட்டுள்ளன.

மருத்துவப் பரிசோதனை சவால்களும் தீர்வுகளும்

இலங்கைத் தொழிலாளர்கள் மருத்துவப் பரிசோதனைகளை மேற்கொள்வதில் எதிர்நோக்கும் ஏனைய சவால்கள் குறித்தும் இதன்போது கலந்துரையாடப்பட்டது.

GHC அதிகாரிகள் இது தொடர்பான தெளிவுபடுத்தல்களை வழங்கியதுடன், சாத்தியமான தீர்வுகளையும் முன்வைத்தனர்.

எதிர்காலத் திட்டங்கள்

இலங்கைத் தொழிலாளர்களின் நலனை உறுதிப்படுத்தவும், GHC-இன் புதிய விதிமுறைகள் குறித்து விழிப்புணர்வை ஏற்படுத்தவும் இரு தரப்பும் நெருக்கமாகச் செயற்படச் சம்மதித்தன. மேலும், தூதுவர் அமீர் அஜ்வத் முன்வைத்த ஆலோசனையின்படி, சம்பந்தப்பட்ட அனைத்து தரப்பினரையும் உள்ளடக்கி மெய்நிகர் (Virtual) சந்திப்பு ஒன்றை நடத்தி சிக்கல்களுக்குத் தீர்வுகாண பொது மேலாளர் அல்-தாகீல் உடன்பட்டார்.

சந்திப்பில் பங்கேற்றோர்:

இந்தச் சந்திப்பில் வளைகுடா சுகாதார பேரவையின் பிரதி பொது மேலாளர் ரியாத் சலே அல்-அஸாம், ‘வாபிட்’ (Wafid) திட்டத்தின் பணிப்பாளர் அப்துல்லாஹ் இப்ராஹிம் அல்-அங்காரி மற்றும் இலங்கைத் தூதரகத்தின் சார்பில் அமைச்சர்/தூதரகத் தலைவர் முஹம்மது அனஸ், தூதரக ஆலோசனை அதிகாரி (வேலைவாய்ப்பு மற்றும் நலன்புரி) மங்கள ரன்தெனிய ஆகியோர் கலந்துகொண்டனர்.

இலங்கைத் தூதரகம்

ரியாத்